انا رافض رمزى بشاره

أنا باأرفُض إن المَصريين

عاللى بيحصَل يفضَلوا ساكتين

باأرفُض يزرَعوا بينَّا العداوات

ويعاملوا النَّاس على حَسَب الدِّين



طول عُمرنا هِنا أصحاب وإخوات

وِفـ بيت واحد كُلِّنا عايشين

جُم قالوا علينا الله غَضبان

قالوا علينا إننا ضالِّين



+++

يارب صَبَّرنا عاللى حَصَل لينا

يا رب قُدّامَك جينا وِصَلِّينا

يارب شَكوِتنا ليك إنت رافعينها

فيه ناس كتير مجاريح إمسَح دُموع عينها



***

باأرفُض عَلَشان نِبنى كنيسة

نِستَنَّى سنين عَلَشان تَصريح

باأرفُض تِبقَى نفوسنا رخيصة

وِفـ كل شويَّه شَهيد وجَريح



مَنسوب الكُره فـ عَصرِنا زَاد

فَكَّرنى بعَصر الإستِشهاد

أنا باأرفُض بِنتى تسيب الدِّين

مِن غير جَلسِة نُصح وإرشاد



***







باأرفُض مُجرِم يِطلَع مَجنون

بَعد ما يغسِل بالدَّم إيديه

باأرفُض نِسمَح لِمُظاهره تكون

بتهين إنسان وِبتِشتِم فيه



أو أشُوف واحد فى التليفِزيون

بيقُول إن كِتابنا مُحَرَّف

مَشاكِلنا كتير وإلهنا كبير

ربِّنا موجود وِهَنِتصَرَّف



***

جامِع وكنيسة جَرس وأدان

حاضنين بَعض مناره ومَدنه

واقفين كُلِّنا ضِد العِدوان

إللى مهاجِم مَصر بَلَدنا



وِهَتِتحَل مَشاكِل الأقباط

مِن جُوُّه الأسره المَصرِيَّه

مِش بَس خُطَب وكلام شِعارات

لَكِن بِمَحَبَّه حَقيقيَّه